Meniños Cantores 2

QUE É ?

Meniños Cantores 2 é un proxecto de Ponte…nas ondas! coeditado co Consello da Cultura Galega, producido por Casa de Tolos e publicado por PAI Edicións S.L. Conta co aporte financiero do Xacobeo 2020-21 e a TVG.

Trátase dunha nova proposta realizada a partir da primeira edición de Meniños Cantores editada en 2005. Naquel entón foron 17 centros educativos localizados entre Vigo e Porto quen recrearon temas do patrimonio musical galego-portugués. Un tema común composto por Uxía Senlle e Segundo Grandío foi gravado nun videoclip na ponte entre Tui e Valença por máis de 500 xoves das dúas beiras. O traballo realizado foi presentado como un exemplo do compromiso das escolas co patrimonio inmaterial galego-portugués que fora presentado na UNESCO por Ponte…nas ondas! co aval de Portugal e España.

Meniños Cantores 2 é un proxecto realizado por 17 centros educativos ao longo da fronteira galego-portuguesa, desde Chaves a Caminha e desde Verín a A Guarda.

Un proxecto que conta con: 18 temas musicais, un documental e un libro.

Cada centro educativo preparou unha versión do repertorio da música popular galego-portuguesa, interpretouno co alumnado e contou coa colaboración dun artista ou grupo de música co que gravaron o tema.

Os participantes presentan unha grande diversidadade: desde alumnado de educación infantil, ensino primario, ensino secundario, educación especial, grupos corais, bandas de música, etc.

Os padriños e madriñas musicais foron elixidos polos participantes e propostos por Ponte…nas ondas! O obxectivo foi que os artistas e músicos profesionais apoiasen o traballo do alumnado co tema musical e puidesen gravar xuntos.

Nesta ocasión foron os artistas colaboradores os encargados de gravar o tema común Máis perto, unha nova versión do gravado en 2005 na ponte de Tui-Valença.

Paralelamente á gravación do disco, completouse todo o proceso para realizar un documental que recolle declaracións do profesorado implicado, opinións do alumnado, testemuñas de persoas portadoras, imaxes dos lugares de gravación e videoclips protagonizados polo alumnado e os artistas colaboradores.

Ademais, realizouse un traballo de selección de vocabulario específico de ambos lados da fronteira co que se configurou un glosario.

Inclúe textos da escritora galega Rosa Aneiros, do escritor portugués Marco Neves e dos profesores Helena Pousa e Santiago Veloso, presidente de Ponte…nas ondas!
Preséntase unha breve descrición de cada centro educativo e unha referencia ao patrimonio cultural do concello, onde se recollen expresións e vocabulario característico de cada municipio. Co léxico recollido elaborouse un GLOSARIO.

Hai imaxes de todo o proceso de gravación e ilustracións do debuxante Andrés Meixide.